Ehi Igbo (poem) by Izunna Okafor on AuthorsDen

Ehi Igbo
by Izunna Okafor → (All Poetry by Izunna Okafor)
Monday, August 5, 2019 Rated "G" by the Author.

Save

This poem 'Ehi Igbo' poetically defines and adores the Igbo specie of cow.

Izunna Okafor dere abụ a Pòkòpòkò ka ọ na-ézè N'anya Chukwu na n'anya mmadụ Ihe dị mma na anya gbàrà Ị hụkwàrà anụ na mma Ehi Igbo ka ọ bụ. Lekene ụyọkọtọ ara ya Na àkpàkwùrù amụ ndị bụ óké Ìtè afọ ya, na àpàtà ụkwụ ya Ihe ndị a niile bụcha anụ anụ Ehi Igbo ka ọ bụ. Ọ naghị achọ nwoke okwu Nke o ji achọ nwaanyị Ọ naghị ebíbì ihe a kọrọ n'úgbō Ma ya fọdụzie ịràkọ mmadụ na onye nwe ya Ehi Igbo ka ọ bụ. Ehi Igbo anaghị eri óké egō Mana úrù ya kàrịrị nke ndi ngō Ịzụ ya anaghị ewèta ihe arụ Maka na onye nwe ya ñụjùrù mmiri ara afọ Ehi Igbo ka ọ bụ. Ehi Igbo na-amụ nwa juru eju Ụmụ ya na-etokwa ọsọọsọ Ehi Igbo na-agba óké anụ Anụ ya bụkwa ezigbo ihe ụtọ Ehi Igbo ka ọ bụ Ehi Igbo anaghị anwụ hịam Dịka nke ndị ngō Ọ bụghị ọrịa niile na-atụkwa ya Maka na onye nwe ya ma ihe o jìrì zụọ ya Ehi Igbo ka ọ bụ Ehi Igbo achọghị AK47 Ehi Igbo achọghịkwa RUGA Maka na agbụgbọ dị ya ahụ mma Ehi Igbo bụ anụ ụlọ Ehi Igbo ka ọ bụ Ehi Igbo na mmadụ anaghị akwàkọ iko Maka na nke ahụ bụ ihe arụ Ehi Igbo anaghị àwá isi Okwu na ụka abụghịkwa njirimara ya Ehi Igbo ka ọ bụ. Ehi Igbo dị mfé ọkpụkpa Ehi Igbo na-agbasi ike Ehi Igbo na-adị ọcha Ehi Igbo bụkwa sọ mma Ehi Igbo ka ọ bụ. Ụmụ Igbo zụbanụ ehi Igbo Ụmụ Igbo ribenụ ehi Igbo Maka na nke a bụ nke anyị Ehi Igbo atọgbuo m Kpọọ nụ ya ehi Igbo... Ehi Igbo... ©Izunna Okafor, 2019. Maka Onye Dere Abụ A Izunna Okafor bụ nwaafọ Ebenatọr dị n'okpuru ọchịchị Nnewi Sawụtụ nke steeti Anambra. Ọ bụ onye edemede iduazị na abụ, onye nta akụkọ na onye nkwàlite asụsụ Igbo. Ọ gụrụ na mahadum Nnamdị Azikiwe dị n'Awka, bụ ebe o mere maka ihe ọmụmụ nhazi ọhanaeze bụ 'Public Administration' n'olu bekee. Dịka onye edemede, o nwetala ntúrú ùgò na nkwanye ùgwù karịrị iri abụọ na ise n'ihe gbasaara edemede, site n'ala anyị na n'ogoogo mba òfèsi. Nturu ùgò na nkwanye ùgwù ndị ahụ gụnyere: Nigerian Writers Award/Indigenous Writer of The Year 2015/2016; Pita Nwanna Award for Igbo Literature 2015; Nigerian Heritage Icon Award/Young Writer of the Year Federal Republic of Nigeria 2016; Anambra Exclusive Youth Choice Award/Youth Writer of The Year 2016; Future Award Africa 2016/African Prize For Education; SLAM Hero Youth International Award/Innovative Youth of the Year 2016; Inspire Award/Outstanding Youth in Academics 2017; Ezenwa Ohaeto Prize for Young Nigerian Novelists 2015; Campus Best Writer/Journalist of The Year 2018, tinyere ọtụtụ ndị ọzọ. Dịka onye nta akụkọ, ọ na-arụ n'ụlọ mbipụta akwụkwọ akụkọ National Light, Ka Ọ Dị Taa na Sportslight Xtra, ma na-arụkwa n'ụlọ ọrụ Igbo Radio, bụ ụlọ ọrụ dị n'ikùkù ma nwee isi ngàlàbà ya na mba Canada. Izunna na-ede akwụkwọ n'asụsụ Igbo na n'asụsụ bekee, ma bụrụkwa onye e jìrì ịkwàlìtè asụsụ na omenala Igbo wee mara. O deela akwụkwọ asatọ, ma nwekwa edemede karịrị narị asatọ n'ọnụ ọgụgụ o bipùtagòrò n'ìkùkù. Ọ bụ onye isi òtù jikọtara ndị ntorobịa na-ede akwụkwọ n'ala Nigeria, ngalaba steeti Anambra.

Reviewed by Izunna Okafor

Reviewed on August 8, 2019

You're are not far from it, Ronald.

As said in description, the poem 'Ehi Igbo' poetically defines and adores the Igbo specie of cow.

Thank you for reading Sir.

Reviewed by Ronald Hull

Reviewed on August 7, 2019

I wish I could read your language. From the photograph, in English, I believe the Ehi Igbo, you are writing about is the Holstein. My grandmother had dairy cows, and she preferred the Guernsey because it gave higher butterfat content milk.

Ron